చంద్రశేఖర చంద్రశేఖర చంద్రశేఖర పాహిమామ్
చంద్రశేఖర చంద్రశేఖర చంద్రశేఖర రక్షమామ్
రత్నసానుశరాసనం రజతాద్రిశృంగనికేతనం
శింజినీకృతపన్నగేశ్వర మచ్యుతానలసాయకం
క్షిప్రదగ్ధపురత్రయం త్రిదశాలయై రభివందితం
చంద్రశేఖర మాశ్రయే మమ కింకరిష్యతి వైయమః
పంచపాదపపుష్పగంధపదాంబుజద్వయశోభితం
ఫాలలోచనజాతపావకదగ్ధమన్మథవిగ్రహమ్
భస్మదిగ్ధకలేబరం భవనాశనం భవ మవ్యయం
చంద్రశేఖర మాశ్రయే మమ కింకరిష్యతి వైయమః
మత్తవారణముఖ్యచర్మకృతోత్తరీయమనోహరం
పంకజాసనపద్మలోచనపూజితాంఘ్రిసరోరుహమ్
దేవసింధుతరంగశీకరసిక్తశుభ్రజటాధరం
చంద్రశేఖర మాశ్రయే మమ కింకరిష్యతి వైయమః
యక్షరాజసఖం భగాక్షహరం భుజంగవిభూషణం
శైలరాజసుతాపరిష్కృతచారువామకళేబరమ్
క్ష్వేలనీలగళం పరశ్వధధారిణం మృగధారిణం
చంద్రశేఖర మాశ్రయే మమ కింకరిష్యతి వైయమః
కుండలీకృతకుండలీశ్వరకుండలం వృషవాహనం
నారదాదిమునీశ్వరస్తుతవైభవం భువనేశ్వరమ్
అంధకాంతక మాశ్రితామరపాదపం శమనాంతకం
చంద్రశేఖర మాశ్రయే మమ కింకరిష్యతి వైయమః
భేషజం భవరోగిణా మఖిలాపదా మపహారిణం
దక్షయజ్ఞవినాశనం త్రిగుణాత్మకం త్రివిలోచనమ్
భుక్తిముక్తిఫలప్రదం సకలాఘసంఘనిబర్హణం
చంద్రశేఖర మాశ్రయే మమ కింకరిష్యతి వైయమః
భక్తవత్సల మర్చితం నిధి మక్షయం హరిదంబరం
సర్వభూతపతిం పరాత్పర మప్రమేయ మనుత్తమమ్
సోమవారుణభూహుతాశనసోమపానిలఖాకృతిం
చంద్రశేఖర మాశ్రయే మమ కింకరిష్యతి వైయమః
విశ్వసృష్టివిధాయినం పునరేవ పాలనతత్పరం
సంహరంత మపి ప్రపంచ మశేషలోకనివాసినమ్
క్రీడయంత మహర్నిశం గణనాథయూధసమన్వితం
చంద్రశేఖర మాశ్రయే మమ కింకరిష్యతి వైయమః
మృత్యుభీతమృకండుసూనుకృతస్తవం శివసన్నిధౌ
యత్రకుత్రచయః పఠే న్నహి తస్య మృత్యుభయంభవేత్
పూర్ణమాయు రరోగతా మఖిలార్థసంపద మాదరం
చంద్రశేఖర ఏవ తస్య దదాతి ముక్తి మయత్నతః
~ ఇతి చంద్రశేఖరాష్టకమ్ ~
Audio Courtesy: Sri Guruprasad Chandrasekhar
0 comments:
Post a Comment